18 ოქტომბერს, ღირსი მამა გრიგოლ ხანძთელის და კლარჯეთის უდაბნოს ღირსთა მამათა და დედათა ხსენების დღეს, გორისა და ატენის მიტროპოლიტმა ანდრიამ ღამისთევის სადღესასწაულო მსახურება აღავლინა ყოვლადწმინდა ღვთისმშობლის შობის გორის საკათედრო ტაძარში.
სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია II-ის ლოცვა-კურთხევით დეკანოზის ხარისხში აყვანილ იქნენ მღვდლები ბასილ ფოსური - ფერისცვალების ტაძრის წინამძღვარი და მღვდელი იოანე ბონდარენკო - მთავარანგელოზთა ტაძრის წინამძღვარი. საქართველოში დეკანოზის წოდება XIX საუკუნიდან მოყოლებული ეძლევათ მხოლოდ თეთრი სამღვდელოების წარმომადგენლებს, როგორც საპატიო ტიტული დამსახურებისა და ერთგული მსახურებისთვის. მამების დამსახურებას სასულიერო სარბიელზე გიმნაზიაში საღვთო სჯულის მასწავლებლობაც ემატება. ვულოცავთ მათ საპატიო წოდების მინიჭებას! სადღესასწაულო წირვას გიმნაზიის მასწავლებლები, მოსწავლეები და კურსდამთავრებულებიც მონაწილეობდნენ. მსახურების დასრულების შემდეგ მღვდელმთავარმა სასულიერო პირებსა და მრევლს საჩუქრები გადასცა.
