ადამიანის საცხოვრებელი ადგილი გეოგრაფიული მდებარეობით განსხვავებულია (ზონალურობა, კლიმატის ფაქტორები, ნიადაგის გეოქიმიური ბალანსი და სხვა)
ინტერესს იწვევს ის ადაპტაციები, რომლებიც ადამიანის სხვადასხვა გარემოსთან შეგუებას განაპირობებენ. სწორედ ასეთ ბიოგეოგრაფიულ საკითხებს მიეძღვნა 25 დეკემბერს ჩატარებული ინტეგრირებული გაკვეთილი წმ. გიორგის სახელობის მე-9 კლასში (მასწავლებლები: მაია ქურდაძე (ბიოლოგია), ლელა ყეინაშვილი (გეოგრაფია)).

21 დეკემბერს პირველკლასელებმა პირველი სასწავლო სემესტრი დაასრულეს. მათ შობა-ახალი წელი წინასწარ მიულოცეს,  ღირსი მამა იოანე ათონელის სახელობის II კლასის მოსწავლეებმა და საშობაო წარმოდგენით გააცილეს არდადეგებზე.

21 დეკემბერს წმ. მეფე დავით აღმაშენებლის სახელობის I კლასის მოსწავლეებმა გამართეს მათემატიკური კონკურსი. კონკურსის მიზანი იყო პირველ სემესტრში შესწავლილი მასალის განმტკიცება და ჯგუფური მუშაობის გამოცდილების გამოყენება. კლასი ოთხჯგუფად იყო გაყოფილი. გამოვლინდა საუკეთესო ჯგუფი, რომლის კაპიტანი იყო მარიამ კილაძე. 

21 დეკემბერს წმ. მოწამეთა და აღმსარებელთა ძმები კარბელაშვილების სახელობის I კლასმა წარმოადგინა მაცხოვრის შობის ბრწყინვალე დღესასწაულისადმი მიძღვნილი საშობაო ზღაპარი (კლასის ხელმძღვანელი მაია ბუხრაძე). მოსწავლეებმა დიდი მონდომებით შეასრულეს სხვადასხვა ზღაპრების გმირების როლები. დამსწრე სტუმრებმა პირველკლასელთა შესრულებით მოისმინეს სიმღერები და ლექსები. ამ ღონისძიებით მოსწავლეთა ცხოვრებაში ერთი საინტერესო და დასამახსოვრებელი დღე შედგა.

მოძღვრის საათისა და ფიზიკის გაკვეთილების ინტეგრირება განხორციელდა წმ. გიორგის სახელობის მე-9 კლასში თემაზე „მოძრაობა და უძრაობა მეცნიერული და ქრისტიანული მსოფლმხედველობის ფონზე“, მოძღვარი-მღვდელი ბორისი (ნიჩიპეროვიჩი), ფიზიკის მასწავლებელი-ნაზი გიგოლაშვილი. 20 დეკემბერს ჩატარებული გაკვეთილის მიზანი იყო მოძრაობის, უძრაობისა და მათი ფარდობითობის განხილვა მეცნიერული და რელიგიური თვალსაზრისით, რათა მოსწავლეებს დაენახათ მეცნიერებისა და რელიგიის ერთიანი და არა დაპირისპირებული მიდგომა აღნიშნული საკითხისადმი და ზოგადად, სამყაროში მიმდინარე პროცესებისადმი.

19 დეკემბერს წმ. მეფე დავით აღმაშენებლის სახელობის I კლასის მოსწავლეებმა ახალი წლის მოახლოება აღნიშნეს (კლასის ხელმძღვანელი მაია მაისურაძე). პირველკლასელებმა კარგად მოირგეს ზღაპრების გმირებისა და ტყის ბინადართა როლები. აგიზგიზებულ ბუხართან შეკრებილი პატარებისა და ტყეში მორბენალი ცხოველების საზეიმო განწყობა მოწვეულ  მშობლებსა და მასწავლებლებსაც გადაედოთ, ყველა ერთად კი თოვლის პაპის საჩუქარმა გაახარა.

18 დეკემბერს ჩატარდა მორიგი ღია გაკვეთილი მათემატიკაში, ამჯერად მრავალვნებული ანტონ II-ის სახელობის პირველ კლასში გაკვეთილს მასწავლებელი რუსუდან ოქროპირიძე იძღვებოდა. კოლეგებმა მოისმინეს გაკვეთილი თემაზე „შესაკრებები და ჯამი“. მათემატიკის კათედრის წევრთა შეხვედრაზე, ტრადიციულად, განიხილეს ჩატარებული გაკვეთილი, გამოთქვეს მოსაზრებები. ღია გაკვეთილების ჩატარება გაგრძელდება II სემესტრშიც.

13 დეკემბერს, გიმნაზიის კომპიუტერულ ლაბორატორიაში, ბიოლოგიის მასწავლებელმა თეა ნონიკაშვილმა კოლეგებსა და გიმნაზიის ადმინისტრაციის წევრებს გააცნო edmodo - განათლების სოციალური ქსელი მასწავლებლებისათვის, მოსწავლეებისათვის და სკოლებისათვის. გიმნაზიის მასწავლებლები დარეგისტრირდნენ განათლების სოციალურ ქსელში, გაეცნენ ქსელში მუშაობის პრინციპებს, დავალებებისა და ტესტების შექმნის მექანიზმებს, შექმნეს სამოდელო ტესტები.