ღირსი მამა გიორგი მთაწმინდელის გორის გიმნაზიის პროექტი - წარჩინებული მოსწავლეების წამახალისებელი მოგზაურობა, სწავლისათვის მოსწავლეთა მოტივაციის ამაღლებას ისახავს მიზნად. 2017 წლის 9-10-11 სექტემბერს, სწორედ, 2016-2017 სასწავლო წლის 22 წარჩინებული მოსწავლე და გიმნაზიის ტაძრის ორი მგალობელი გაემგზავრა სამეგრელოში. პროექტს გიმნაზიის აღმასრულებელი დირექტორი, დეკანოზი ბორისი (ნიჩიპეროვიჩი)  ხელმძღვანელობდა. მოსწავლეებმა დაათვალიერეს სამეგრელოს ისტორიული და ბუნების ძეგლები, მუზეუმები, მოილოცეს ზუგდიდისა და ცაიშის,  ჭყონდიდის, სენაკისა და ჩხოროწყუს ეპარქიების ეკლესია-მონასტრები. გიმნაზიელები, ზუგდიდელი მეგობრების დახმარებით, მიეახლნენ ყოვლადწმიდა ღვთისმშობლის  სამოსელს. მოგზაურებზე წარუშლელი შთაბეჭდილება დატოვა კონსტანტინე გამსახურდიას სახლ-მუზეუმმა, დადიანების სასახლემ და მასში დაცულმა საგანძურმა,  ნოქალაქევის არქეოლოგიურმა მუზეუმ-ნაკრძალმა. რამდენიმე დღეში მოსწავლეები ახალი ცოდნითა და შთაბეჭდილებებით შეუდგებიან სწავლას. წარმატებას ვუსურვებთ მათ 2017-2018 სასწავლო წელს!